العريي24
عبد الرحمان الحواصلي :
استفدت بزاف من تجربة الرجاء واخا مالعبتش ، تعلمت بزاف وذيك الساعة كنت حشومي ، ولا بغيتي تلعب في الرجا خاصك تكون ضاسر ، والظروف ديالي ذيك الساعة كانت مانعاني حيث كنت ما زال في السلك لي كنت منتمي ليه ، وكان ممنوع عليا ندير شي تصرف ، ما كنتش أكثر تحرر ، وماكانتش عندي علاقات في الكواليس باش نلعب حيث خاصك ضروري ناس لي يهضرو عليك ويدافعو عليك باش تلعب .
الصراحة تعلمت بزاف من الفيستيير ديال الرجاء ذيك الفترة حيث كانوا لاعبين كبار ، والعسكري كان قال ليا أنا منافس ديالك ولكن لا بقيتي درويش هاكا ماعمرك غاتلعب .
فاش جيت للرجا من الكوديم أنا وخالد العسكري لي جا من شباب الريف الحسيمي ، ذيك الساعة الرجاء كان فيها ثلاثة حراس آخرين ، يونس عتبة ، طارق الجرموني ، وياسين الحظ ، يعني كنا 5 حراس أيام بيرتران مارشان ، وكانت المداورة بيناتنا بثلاثة أنا في الاحتياط والعسكري والحظ تايلعبو ماتش بماتش ، وياسين الحظ ذيك الساعة تلونصا مزيان بعدما جيت أنا والعسكري في الميركاتو الشتوي ، وكنا حنا لي غانلعبو ، للأسف أنا مالعبتش وبقيت بزاف في الاحتياط ، وما خذيتش الفرصة ديالي في الرجاء.
مشيت من الرجاء حيث كنت باغي نلعب ، واخا كنت أنا البديل ديال العسكري في معسكر الصيف ملي جا بودريقة وفاخر ، وبعدما هضرت مع فاخر أكد ليا أنني غانكون الحارس الاحتياطي ، وداكشي علاش قررت نمشي ، وفسخت وما خذيت تا درهم حيث كان الهدف ديالي نمشي نلعب بعدما اتصل بيا رشيد الطاوسي وقنعني باش نمشي للجيش الملكي .
أنا كنت جيت للرجاء باش نلعب ، حيث الرجاء فريق كبير ، ولكن ماشي باش نهز اللوغو ونتصور ويتصورو معايا الناس فقط.